اگر دیر کا مطلب انکار ہوتا، تو اللہ۔سبحانہٰ و تعالیٰ حضرت یعقوبؑ کو برسوں بعد حضرت یوسفؑ سے نہ ملواتے۔ بعض اوقات تاخیر محرومی نہیں ہوتی، بلکہ بہترین وقت پر عطا ہونے والی رحمت ہوتی ہے۔

آپ نے کبھی برگد (بوہڑ) کا درخت دیکھا ہے؟ یہ دنیا کے سب سے بڑے اور گھنے درختوں میں شمار ہوتا ہے۔ اس کی شاخیں اتنی لمبی ہوتی ہیں کہ وہ واپس زمین کو چھوتی ہیں اور خود نئی جڑیں بن جاتی ہیں۔ ایک پرانے برگد کے درخت کے نیچے ہزاروں لوگ سایہ لے سکتے ہیں۔لیکن کیا آپ جانتے ہیں کہ اگر آپ اسی برگد کے بیج کو ایک چھوٹے سے گملے میں بو دیں تو کیا ہوگا؟بیج پھٹے گا، پودا نکلے گا، تھوڑا سا بڑا ہوگا اور پھر اس کا قد رک جائے گا۔ آپ اسے جتنا مرضی پانی دیں، بہترین کھاد ڈالیں، صبح و شام دھوپ میں رکھیں، وہ ایک چھوٹی سی جھاڑی سے زیادہ بڑا نہیں ہو سکے گا۔ایسا کیوں ہوا؟ بیج تو وہی تھا، کھاد اور پانی بھی بہترین تھا، پھر یہ درخت کیوں نہ بن سکا؟ کیونکہ اس پودے کی جڑوں کو گملے کی دیواروں نے قید کر لیا تھا۔ پودے کی جڑوں نے مٹی کی حد دیکھ کر خود کو یہ پیغام دے دیا کہ "بس، میری دنیا اتنی ہی ہے۔ اس سے آگے میں نہیں بڑھ سکتا۔"آپ یقین کریں، انسان کا ذہن بھی بالکل اس گملے والے پودے کی طرح ہوتا ہے۔ہم میں سے بے شمار لوگ پیدائشی طور پر برگد کا بیج ہوتے ہیں۔ ان کے اندر کمال کرنے کی صلاحیت ہوتی ہے۔ وہ دنیا بدل سکتے ہیں لیکن وہ زندگی بھر ایک چھوٹے سے گملے میں قید ہو کر رہ جاتے ہیں۔یہ گملا کیا ہے؟ یہ گملا ہماری "سوچ کا سانچہ" ہے۔ ہم بچپن سے اپنے اردگرد چند باتیں سنتے ہیں: "جتنی چادر ہو اتنے پاؤں پھیلاؤ"، "ہم غریب لوگ ہیں، ہم کوئی بڑا کام نہیں کر سکتے"، "یہ چیز ہمارے بس کی نہیں"۔ یہ ساری باتیں وہ مٹی اور وہ گملا ہیں جو ہمارے ذہن کو باندھ دیتے ہیں۔ ہم مان لیتے ہیں کہ ہماری حد بس یہی ہے اور ہم کبھی ترقی نہیں کر پاتے۔تو پھر سوال یہ ہے کہ ترقی پسند سوچ کیسے بنتی ہے؟ ذہن کو بدلا کیسے جائے؟یہ بہت سیدھا سا کام ہے۔ آپ نے صرف اپنے ذہن کا گملا توڑنا ہے اور اپنی سوچ کو کھلی زمین میں بونا ہے۔ کیسے؟ میں آپ کو تین سادہ سے کام بتاتا ہوں، آپ آج سے شروع کر دیں، آپ کی زندگی بدل جائے گی۔پہلا قدماپنے اندر کے سوال بدل دیںہم جب بھی کوئی مشکل دیکھتے ہیں تو ہمارا ذہن فوراً کہتا ہے "میں یہ نہیں کر سکتا"۔ آپ نے صرف اتنا کرنا ہے کہ آج کے بعد اس جملے پر پابندی لگا دینی ہے۔ اس کی جگہ خود سے پوچھنا ہے "میں یہ کیسے کر سکتا ہوں؟"یہ ایک بہت معمولی سی تبدیلی لگتی ہے لیکن اس کا جادو بہت بڑا ہے۔ جب آپ کہتے ہیں "میں نہیں کر سکتا"، تو آپ کا دماغ سو جاتا ہے، وہ کام کرنا بند کر دیتا ہے۔ لیکن جب آپ کہتے ہیں "میں یہ کیسے کر سکتا ہوں؟"، تو آپ کا دماغ فوراً جاگ جاتا ہے اور راستے تلاش کرنے لگتا ہے۔ یہ ایک سوال آپ کے ذہن کی دیواریں گرا دیتا ہے۔دوسری باتہار کو استاد مان لیںہمیں بچپن سے ڈرایا جاتا ہے کہ ناکامی بہت بری چیز ہے۔ جو گر گیا، وہ ہار گیا۔ حالانکہ حقیقت یہ ہے کہ چلنا سیکھنے والا بچہ بھی سیکڑوں بار گرتا ہے۔ اگر وہ گرنے سے ڈر جائے تو وہ زندگی بھر اپنے پیروں پر کھڑا نہیں ہو سکتا۔آپ آج سے ہارنے کا خوف دل سے نکال دیں۔ جب بھی کوئی کام خراب ہو، کوئی نقصان ہو جائے، تو خود سے کہیں "میں ہارا نہیں ہوں، میں نے ایک نیا سبق سیکھا ہے"۔ جس دن آپ ناکامی کو سزا کے بجائے اپنا استاد مان لیں گے، آپ کے ذہن پر لگا ہوا خوف کا تالا ٹوٹ جائے گا۔تیسرا اور آخری کامشکوے کرنا چھوڑ دیںہماری سب سے بڑی بیماری یہ ہے کہ ہم حالات کا، محلے داروں کا، حکومت کا اور قسمت کا رونا روتے رہتے ہیں۔ یاد رکھیں، جو انسان ہر وقت شکایت کرتا ہے، وہ کبھی ترقی نہیں کر سکتا۔ کیوں؟ کیونکہ اس کا سارا دھیان اس بات پر ہوتا ہے کہ "کیا برا ہو رہا ہے"، اس کا دھیان اس طرف ہوتا ہی نہیں کہ "اسے ٹھیک کیسے کیا جا سکتا ہے"۔آج سے شکوہ کرنا بند کر دیں۔ جو حالات ہیں، انہیں دل سے قبول کریں اور سوچیں کہ ان ہی حالات میں رہتے ہوئے میں کیا نیا اور کیا بہتر کر سکتا ہوں۔یہ تین کام دراصل کیا ہیں؟ یہ اپنے ذہن کو ایک چھوٹے سے گملے سے نکال کر کھلی زمین میں بونے کا عمل ہے۔جس دن آپ کی سوچ اس سانچے سے باہر نکل آئی، آپ حیران رہ جائیں گے کہ دنیا کے دروازے خود بخود کھلنا شروع ہو گئے ہیں۔ آپ کا ذہن بھی برگد کے درخت کی طرح پھیلنے لگے گا اور آپ کی چھاؤں میں بیٹھ کر لوگ سکون لیں گے۔ کیونکہ یاد رکھیں، دنیا میں کوئی بھی انسان ایسا نہیں بنا جو اپنی سوچ بدل کر اپنی قسمت نہ بدل سکے۔بس شرط یہ ہے کہ انسان کو اپنا گملا توڑنے کی ہمت کرنی پڑتی ہے۔ کیا آپ آج اپنا گملا توڑنے کے لیے تیار ہیں؟#جاوید_تیموری