سوشل میڈیا، مغربی معاشرے اور قرآنی تعلیمات: نسلوں کے درمیان بڑھتا فاصلہ اور اس کا حل
مغربی ممالک خصوصاً برطانیہ، امریکہ، کینیڈا اور آسٹریلیا میں مقیم مسلم خاندان آج ایک اہم سماجی چیلنج کا سامنا کر رہے ہیں۔ والدین اپنی مذہبی، ثقافتی اور خاندانی اقدار کو محفوظ رکھنا چاہتے ہیں، جبکہ نئی نسل سوشل میڈیا، ڈیجیٹل کلچر اور مغربی معاشرتی رجحانات سے گہرا اثر قبول کر رہی ہے۔ نتیجتاً والدین اور اولاد کے درمیان فکری، تہذیبی اور رویّاتی فاصلے بڑھ رہے ہیں۔
اعداد و شمار اس مسئلے کی سنگینی کو واضح کرتے ہیں۔ برطانیہ میں میڈیا ریگولیٹر آف کام (Ofcom) کی رپورٹ کے مطابق 12 سے 17 سال کی عمر کے 90 فیصد سے زائد نوجوان روزانہ سوشل میڈیا استعمال کرتے ہیں، جبکہ بڑی تعداد اپنی معلومات، آراء اور سماجی رویوں کی تشکیل کے لیے بھی انہی پلیٹ فارمز پر انحصار کرتی ہے۔ امریکہ میں پیو ریسرچ سینٹر (Pew Research Center) کے مطابق تقریباً 95 فیصد نوجوان کسی نہ کسی سوشل میڈیا پلیٹ فارم سے منسلک ہیں، جبکہ 46 فیصد نوجوان تقریباً مسلسل آن لائن رہتے ہیں۔ یہ اعداد و شمار ظاہر کرتے ہیں کہ نئی نسل کی فکری تشکیل میں سوشل میڈیا ایک بنیادی کردار ادا کر رہا ہے۔
قرآنِ مجید والدین اور اولاد کے تعلق کو مضبوط معاشرے کی بنیاد قرار دیتا ہے۔ اللہ تعالیٰ فرماتا ہے:
"وَقُلْ رَبِّ ارْحَمْهُمَا كَمَا رَبَّيَانِي صَغِيرًا"(بنی اسرائیل: 24)
ترجمہ: "اور دعا کرو کہ اے میرے رب! ان دونوں پر رحم فرما جس طرح انہوں نے بچپن میں میری پرورش کی۔"
اسلام احترامِ والدین، خاندانی یکجہتی اور باہمی مشاورت کی تعلیم دیتا ہے۔ دوسری طرف نوجوانوں کی نفسیاتی اور سماجی ضروریات کو سمجھنے کی بھی تلقین کرتا ہے۔ مسئلہ اس وقت پیدا ہوتا ہے جب سوشل میڈیا کی دنیا اور گھر کی اقدار ایک دوسرے سے متصادم محسوس ہونے لگتی ہیں۔
اس چیلنج کے حل کے لیے چند عملی اقدامات ناگزیر ہیں:
1. والدین بچوں کے ساتھ مسلسل مکالمہ اور اعتماد کا رشتہ قائم کریں۔2. گھروں میں اردو، عربی اور اسلامی تعلیم کے فروغ کا اہتمام کیا جائے۔3. نوجوانوں کو سوشل میڈیا کے مثبت اور تعمیری استعمال کی تربیت دی جائے۔4. مساجد، اسلامی مراکز اور کمیونٹی اداروں کو نسلوں کے درمیان پل کا کردار ادا کرنا چاہیے۔5. والدین خود جدید ٹیکنالوجی اور سوشل میڈیا کے رجحانات سے آگاہی حاصل کریں۔6. قرآنی تعلیمات کو محض نصیحت کے بجائے عملی نمونہ بنا کر پیش کیا جائے۔
حقیقت یہ ہے کہ سوشل میڈیا بذاتِ خود مسئلہ نہیں بلکہ اس کا غیر متوازن استعمال مسئلہ ہے۔ اگر قرآنی تعلیمات، خاندانی اقدار اور جدید ٹیکنالوجی کے درمیان توازن پیدا کر لیا جائے تو یہی سوشل میڈیا نئی نسل کی تعلیم، تربیت اور دینی شعور کے فروغ کا مؤثر ذریعہ بن سکتا ہے۔ آج مسلم خاندانوں کو تصادم نہیں بلکہ مکالمے، حکمت اور قرآنی رہنمائی کی ضرورت ہے تاکہ آنے والی نسلیں اپنی دینی شناخت برقرار رکھتے ہوئے عالمی معاشرے میں مثبت کردار ادا کر سکیں۔
✍️ ڈاکٹر قاری حفیظ اللہ خانSocialMedia #IslamicStudies #QuranicGuidance #MuslimYouth #FamilyValues #DigitalAge #BritishMuslims #Parenting #IslamicEducation #DrQariHafeezullahKhan #LinkedInPakistan #ResearchArticle

انسانی دماغ اور ڈوپامین کا راز
انسانی دماغ ایک نہایت پیچیدہ اور حیرت انگیز نظام ہے، جس کے اندر بے شمار کیمیائی عمل جاری رہتے ہیں۔ انہی میں سے ایک اہم نظام ڈوپامین سسٹم ہے، جو ہماری خوشی، تحریک، سیکھنے اور انعام کے احساس سے گہرا تعلق رکھتا ہے۔ بظاہر یہ ایک سادہ سا کیمیائی مادہ معلوم ہوتا ہے، مگر درحقیقت یہی مادہ انسانی رویوں، عادات اور فیصلوں پر گہرا اثر ڈالتا ہے۔
ڈوپامین دراصل ایک نیوروٹرانسمیٹر ہے، یعنی ایسا کیمیائی پیغام رساں جو دماغ کے خلیوں کے درمیان رابطہ قائم کرتا ہے۔ جب بھی ہم کوئی ایسا عمل کرتے ہیں جو ہمیں خوشی دیتا ہے، جیسے کامیابی حاصل کرنا، پسندیدہ کھانا کھانا یا کسی کی تعریف سننا، تو دماغ میں ڈوپامین خارج ہوتا ہے۔ یہ اخراج دراصل دماغ کا ایک پیغام ہوتا ہے کہ "یہ عمل مفید اور خوشگوار ہے، اسے دوبارہ دہرایا جائے۔"
ڈوپامین سسٹم دماغ کے مختلف راستوں کے ذریعے کام کرتا ہے۔ مثال کے طور پر، میسولمبک راستہ وہ نظام ہے جو انعام اور خوشی کے احساس سے وابستہ ہے۔ اسی طرح میسوکورٹیکل راستہ ہماری سوچ، توجہ اور فیصلہ سازی کو متاثر کرتا ہے، جبکہ نائگروسٹرائیٹل راستہ جسم کی حرکات کو منظم کرتا ہے۔ یوں ڈوپامین نہ صرف ذہنی کیفیت بلکہ جسمانی حرکت پر بھی اثرانداز ہوتا ہے۔
جب ڈوپامین خارج ہوتا ہے تو یہ ایک نیوران سے نکل کر دوسرے نیوران کے درمیان موجود خلا، جسے سائنپس کہا جاتا ہے، میں داخل ہوتا ہے۔ وہاں یہ مخصوص ریسپٹرز سے جڑ کر پیغام منتقل کرتا ہے، جس کے نتیجے میں ہمیں خوشی، تحریک یا اطمینان کا احساس ہوتا ہے۔ اس کے بعد یہ مادہ یا تو دوبارہ جذب ہو جاتا ہے یا مخصوص انزائمز کے ذریعے ختم ہو جاتا ہے، تاکہ دماغ میں توازن برقرار رہے۔
دلچسپ بات یہ ہے کہ ڈوپامین کا اخراج صرف بڑی کامیابیوں تک محدود نہیں بلکہ روزمرہ کے چھوٹے چھوٹے تجربات، جیسے سوشل میڈیا نوٹیفکیشن یا کسی کھیل میں کامیابی، بھی اس نظام کو متحرک کر دیتے ہیں۔ یہی وجہ ہے کہ انسان بار بار انہی سرگرمیوں کی طرف مائل ہوتا ہے جو اسے فوری خوشی فراہم کرتی ہیں۔
تاہم، ہر چیز کی طرح ڈوپامین کا توازن بھی نہایت ضروری ہے۔ اگر اس کی مقدار کم ہو جائے تو انسان ڈپریشن یا پارکنسن جیسی بیماریوں کا شکار ہو سکتا ہے، جبکہ اس کی زیادتی نشے، بے قابو رویے اور دیگر ذہنی مسائل کو جنم دے سکتی ہے۔ اس لیے ایک متوازن اور صحت مند طرزِ زندگی ہی اس نظام کو درست رکھنے کا بہترین ذریعہ ہے۔
مختصراً، ڈوپامین سسٹم انسانی زندگی میں خوشی، حوصلہ اور سیکھنے کی بنیاد فراہم کرتا ہے۔ یہ نہ صرف ہمارے اعمال کو متاثر کرتا ہے بلکہ ہماری شخصیت کی تشکیل میں بھی اہم کردار ادا کرتا ہے۔

فالج اسفل (نچلے دھڑ کا فالج)تفصیل دراصل یہ علامت تصلب جگر وغدد (تیزابیت) تسکین جگر کے سبب ظاہر ہوتی ہےجس وجہ سے بدن کے اندر خشکی بڑھ جاتی ہے خون گاڑھا ہو جاتا ہے جب ان کا اثر حرام مغز پر پڑتا ہے تو وہ اپنا منصبی فعل یعنی بدن کے نچلے دھڑکا کنٹرول چھوڑ دیتا ہے جس کا دوسرا نام بریک ڈاؤن نرو سسٹم ہے اس حالت کا نام فالج اسفل ہےاسباب جب کوئی شخص ایسی غذیہ و ادویا بکثرت کھاتا رہے جن کا مزاج خشک سرد یا خشک گرم ہو ان کے مسلسل و بکثرت کھانے کے نتیجے میں دوسرے لفظوں میں ان کے رد عمل کے باعث محور میں تصلب پیدا ہوتا ہے جس وجہ سے اعصابی نظام معطل ہو جاتا ہے اور نچلے دھڑکی حص و حرکت ختم ہو جاتی ہے
پیشاب بلا ارادہ نکل جاتا ہے کسی کا بلڈ پریشر ہائی ہوتا ہے اور کسی کا نارمل ہوتا ہے مریض کو نیند نہیں اتی گھبراہٹ ہوتی ہے قبض کا عرصہ ہونے کے ساتھ ساتھ بھوک مر جاتی ہے دن بدن کمزوری بڑھنے لگتی ہے اور بدن میں خون کی کمی بھی ہونے لگتی ہے علاج گرم تر و تر گرم غزیہ اور ادویہ دیں انشاءاللہ یقینی کامیابی ہوگی

💥میں نے اپنے پندرہ سالہ بیٹے کو ہوٹل میں برتن دھونے کے کام پہ لگایا تو۔۔سب نے کہا: ڈآکٹر صاحب بہت سخت باپ ہیں۔۔۔ لیکن 😓😓
میرا نام حارث ہے, ڈاکٹر حارث۔۔عمر بیالیس سال۔
راولپنڈی میں ایک چھوٹا سا کلینک چلاتا ہوں۔ لوگ مجھے ڈاکٹر صاحب کہتے ہیں۔ بعض عزت سے، بعض عادت سے، اور بعض اس لیے کہ میرے نام کے ساتھ ڈگری لگی ہوئی ہے۔
مگر میرے ہاتھوں کی لکیروں میں صرف نسخے نہیں لکھے۔
ان میں گرم پانی کی جلن بھی ہے۔
باسی سالن کی بو بھی ہے۔
اور وہ شرمندگی بھی، جو پہلی کمائی کے ساتھ آدمی کے اندر کہیں خاموشی سے پگھلتی ہے۔
میرا ایک بیٹا ہے۔
عمر۔
پندرہ سال کا۔
دبلا پتلا، لمبا، اچھے اسکول میں پڑھنے والا۔ اپنے کمرے میں بیٹھ کر دنیا کے بڑے بڑے مسئلوں پر ویڈیوز دیکھتا ہے، مگر گھر کا پنکھا بند کرنا بھول جاتا ہے۔ کھانا کھاتے ہوئے پلیٹ میں روٹی کا ٹکڑا چھوڑ دیتا ہے، جیسے روٹی بھی کوئی عام چیز ہو۔ جوتے کبھی کبھی آج بھی اس کی ماں صاف کر دیتی ہے، اور وہ شکریہ کہنے کے بجائے موبائل دیکھتے ہوئے صرف “ہاں امی” کہہ دیتا ہے۔
میری بیوی ثنا بہت خیال رکھنے والی عورت ہے۔
ماں کا دل شاید اسی مٹی سے بنا ہوتا ہے جس میں دعا زیادہ اور ڈر کم نہیں ہوتا۔ وہ عمر کو دیکھتی ہے تو اسے اب بھی وہی بچہ دکھائی دیتا ہے جو بخار میں اس کی انگلی پکڑ کر سوتا تھا۔ میں عمر کو دیکھتا ہوں تو مجھے اس کے اندر ایک ایسا لڑکا دکھائی دیتا ہے جو چند سال بعد دنیا کے سامنے اکیلا کھڑا ہو گا، اور دنیا ماں کی طرح اس کے ماتھے پر ہاتھ نہیں رکھے گی۔
گزشتہ شام میں کلینک سے واپس آیا تو ثنا کچن میں کھڑی روٹی اتار رہی تھی۔ عمر ڈائننگ ٹیبل پر بیٹھا موبائل میں گم تھا۔ پلیٹ میں آدھی روٹی پڑی تھی، سالن کا چمچ کنارے پر سوکھ رہا تھا۔
میں نے ہاتھ دھوتے ہوئے کہا:
“ثنا، نوید کا فون آیا تھا۔ اس کے ریستوران میں گرمیوں کی چھٹیوں کے لیے ایک لڑکا چاہیے۔ دن کے تین چار گھنٹے۔ برتن ترتیب دینا، میزوں سے پلیٹیں اٹھانا، کچن میں ہلکی مدد۔ میں سوچ رہا تھا عمر کو بھیج دوں۔”
ثنا کا ہاتھ رک گیا۔
توا گرم تھا، روٹی پھول رہی تھی، مگر اس کی آنکھیں میری طرف اٹھ گئیں۔
“عمر کو؟”
“ہاں، صرف چند گھنٹے۔ نوید اپنا آدمی ہے۔ دستانے ہوں گے، ایپرن ہو گا، کوئی خطرناک کام نہیں۔”
ثنا نے روٹی پلیٹ میں رکھی، آنچ دھیمی کی اور آہستہ سے بولی:
“حارث، ریستوران کا کام آسان نہیں ہوتا۔ کچن میں گرمی ہوتی ہے، بدبو ہوتی ہے، کام کا دباؤ ہوتا ہے۔ برتن دھونا بہت سخت کام ہے۔ عموماً وہی لڑکا سب سے آخر میں نکلتا ہے۔ عمر ابھی بچہ ہے۔”
میں نے عمر کی طرف دیکھا۔
وہ شاید سن رہا تھا، مگر موبائل کی اسکرین پر انگلی پھر بھی چل رہی تھی۔
ثنا کا جملہ میرے اندر اتر گیا۔
“سب سے آخر میں نکلتا ہے۔”
جیسے کسی نے پرانی الماری کھول دی ہو، جس میں برسوں سے بند کپڑوں کے ساتھ کچھ بھولی ہوئی بوئیں بھی رکھی رہ گئی ہوں۔
میں ثنا پر غصہ کر سکتا تھا، مگر غصہ آیا نہیں۔
صرف ایک عجیب سی اداسی آئی۔
ثنا کا خوف غلط نہیں تھا۔ ماں بچے کے ہاتھ دیکھتی ہے کہ کہیں کٹ نہ جائیں۔ باپ کبھی کبھی ان ہاتھوں کے اندر چھپا ہوا آدمی دیکھتا ہے کہ کہیں وہ بننے سے پہلے نرم ہی نہ رہ جائے۔
ثنا چاہتی تھی عمر کے ہاتھ محفوظ رہیں۔
میں چاہتا تھا ان ہاتھوں کو کسی دوسرے کے پسینے کی قیمت معلوم ہو۔
رات کو کھانے کے بعد عمر اپنے کمرے میں چلا گیا۔ ثنا برتن سمیٹنے لگی۔ میں نے دیکھا، عمر اپنی پلیٹ وہیں چھوڑ گیا تھا۔
ثنا نے بغیر کچھ کہے وہ پلیٹ اٹھائی۔
اس پلیٹ میں روٹی کا آدھا ٹکڑا پڑا تھا۔
مجھے اچانک صدر کا وہ چھوٹا سا ریستوران یاد آ گیا۔
میں شاید بارہ تیرہ سال کا تھا۔
ابو کی نوکری چھوٹ گئی تھی۔ گھر میں پیسوں کی تنگی اتنی خاموش تھی کہ امی آٹا گوندتے ہوئے بھی حساب لگاتی رہتیں۔ میں نے چھٹیوں میں کام ڈھونڈنا شروع کیا۔ پہلے محلے میں اخبار ڈالے۔ فجر سے پہلے سائیکل نکالتا۔ سردیوں میں ہاتھ جم جاتے۔ گرمیوں میں پسینہ قمیض کے اندر نمک بن جاتا۔
پھر ایک دن ایک جاننے والے نے مجھے صدر کے ایک ریستوران میں لگا دیا۔
سامنے ہال میں روشنی تھی۔
پیچھے کچن میں بھاپ تھی۔
سامنے لوگ پلیٹیں سجا کر کھاتے تھے۔
پیچھے ہم ان پلیٹوں سے بچا ہوا سالن، مچھلی کی بو، چاول کے دانے اور چکنی ہڈیاں الگ کرتے تھے۔
برتن دھونا کوئی کام نہیں تھا۔
ایک چھوٹی سی جنگ تھی۔
گرم پانی، صابن، چکنائی، شور، جلدی، ڈانٹ، اور آخر میں وہ بدبو جو کپڑوں میں نہیں، آدمی کے غرور میں بس جاتی ہے۔
ایک شام گھر آیا تو امی نے دروازے پر ہی کہا:
“حارث، پہلے نہا لو، بہت بو آ رہی ہے۔”
میں نے جھنجھلا کر کہا:
“امی، یہ کام انسانوں والا نہیں ہے۔”
ابو چارپائی پر بیٹھے تھے۔ انہوں نے اخبار نیچے کیا۔ میری طرف دیکھا۔ آواز بہت دھیمی تھی۔
“کام انسانوں والا ہی ہوتا ہے بیٹا۔ بس کبھی کبھی انسان کام کے قابل نہیں رہتا۔”
میں اس وقت سمجھا نہیں۔
بارہ سال کا لڑکا نصیحت نہیں سمجھتا۔ اسے صرف اپنی تکلیف سچ لگتی ہے۔
مگر آج، اتنے برس بعد، وہ جملہ میرے اندر پھر سے زندہ ہو گیا۔
رات کو میں عمر کے کمرے کے دروازے پر گیا۔
دروازہ آدھا کھلا تھا۔ وہ بیڈ پر لیٹا موبائل دیکھ رہا تھا۔ کمرے میں ائیر فریشنر کی خوشبو تھی، میز پر کتابیں بکھری تھیں، اور ایک خالی جوس کا ڈبہ فرش پر پڑا تھا۔
میں نے کہا:
“بات کرنی ہے۔”
اس نے موبائل سائیڈ پر رکھا۔
“جی ابا۔”
میں کرسی کھینچ کر بیٹھ گیا۔
“عمر، ایک بات یاد رکھنا۔ کبھی یہ نہ سوچنا کہ تم کسی کام کے لیے بہت بڑے ہو۔ آدمی کام سے چھوٹا نہیں ہوتا، کام سے بھاگ کر چھوٹا ہو جاتا ہے۔”
وہ خاموشی سے مجھے دیکھتا رہا۔
میں نے کہا:
“اگر کوئی کہے کہ تم برتن دھونے کے لیے نہیں بنے، تو اس سے پوچھنا کہ پھر برتن دھونے والے کس مٹی کے بنے ہوتے ہیں؟”
اس نے نظریں جھکا لیں۔
میں نے اس کی میز پر پڑا جوس کا خالی ڈبہ اٹھایا اور ڈسٹ بن میں ڈالتے ہوئے کہا:
“مشکل کام آدمی کو جلدی بڑا کرتا ہے۔ آسان کام صرف وقت گزارتا ہے، مشکل کام آنکھ کھولتا ہے۔ اگر تم کچن میں کھڑے ہو کر لوگوں کی چھوڑی ہوئی پلیٹیں صاف کرو گے تو شاید پہلی بار سمجھو گے کہ کھانا ضائع کرنا صرف بری عادت نہیں، کسی اور کی محنت کی بے عزتی بھی ہے۔”
عمر نے آہستہ سے کہا:
“امی کہہ رہی تھیں کام بہت سخت ہے۔”
“امی ٹھیک کہہ رہی ہیں،” میں نے فوراً کہا۔
وہ چونک کر مجھے دیکھنے لگا۔
“کام سخت ہے۔ اسی لیے ضروری ہے۔ بس اتنا خیال رہے گا کہ تم سے کوئی غیر محفوظ یا حد سے زیادہ کام نہ لیا جائے۔ تم مزدور بننے نہیں جا رہے، مزدور کی عزت سیکھنے جا رہے ہو۔”
وہ کچھ دیر خاموش رہا۔
میں نے اسے اپنے پہلے کاموں کے بارے میں بتایا۔ اخبار بانٹنے کے بارے میں۔ ریستوران کے سنک کے بارے میں۔ گرم پانی سے سکڑتی انگلیوں کے بارے میں۔ کلب کے گراؤنڈ میں نالیاں صاف کرنے کے بارے میں۔ اس ریٹائرڈ حوالدار کے بارے میں جس نے مجھے کہا تھا:
“آسان کرسی پر بیٹھنے سے پہلے مشکل زمین پر کھڑا ہونا سیکھو۔”
عمر نے پہلی بار پوری توجہ سے میری طرف دیکھا۔
شاید بچوں کو اپنے والدین کی کہانیاں تب سمجھ آتی ہیں جب وہ ان میں نصیحت کم اور پسینہ زیادہ محسوس کریں۔
میں نے آخر میں کہا:
“کل نوید انکل کے پاس چلے جانا۔ صرف تین گھنٹے۔ دستانے پہننا۔ اگر کوئی مسئلہ ہو تو فوراً مجھے فون کرنا۔ اور اگر مشکل لگے تو فوراً چھوڑنے کا فیصلہ نہ کرنا۔ پہلے سمجھنا کہ مشکل کس چیز کا نام ہے۔”
وہ دیر تک چپ رہا۔
پھر بولا:
“ٹھیک ہے ابا۔ میں کوشش کر لوں گا۔”
دروازے کے باہر ثنا کھڑی تھی۔
اس نے کچھ نہیں کہا۔
صرف اتنا کیا کہ صبح عمر کے لیے صاف قمیض استری کر کے رکھ دی۔
یہی عورت کا اختلاف ہوتا ہے۔ زبان سے “نہیں” کہتی ہے، مگر بچے کے بیگ میں احتیاط سے پانی کی بوتل رکھ دیتی ہے۔
اگلی صبح نوید کا فون آیا۔
“ڈاکٹر صاحب، آپ کا شہزادہ آ گیا ہے۔”
اس کے لہجے میں ہنسی تھی، مگر ہنسی کے نیچے شفقت بھی تھی۔
میں نے پوچھا:
“گھبرا تو نہیں رہا؟”
نوید بولا:
“گھبرا رہا ہے۔ مگر کھڑا ہے۔”
کلینک جانے سے پہلے میں ریستوران کی طرف نکل گیا۔
ریستوران کا پچھلا دروازہ کھلا تھا۔ اندر سے بھاپ نکل رہی تھی۔ کچن میں برتنوں کی کھنک، چولہے کی سانس، مصالحے کی خوشبو، پیاز کے تڑکے اور گرم پانی کی بھاپ ملی ہوئی تھی۔
میں دروازے کے پاس رک گیا۔
عمر سنک کے سامنے کھڑا تھا۔
اس کے بال ماتھے سے چپکے ہوئے تھے۔ آستینیں کہنیوں تک مڑی ہوئی تھیں۔ ہاتھوں میں پیلے دستانے تھے جو اس کے ہاتھوں سے بڑے لگ رہے تھے۔
وہ ایک پلیٹ کو بہت احتیاط سے رگڑ رہا تھا۔
جیسے پلیٹ پر سالن نہیں، کوئی سوال چپکا ہوا ہو۔
ایک ویٹر نے جلدی سے کہا:
“بھائی، پلیٹیں ختم ہو رہی ہیں، ذرا تیز ہاتھ چلاؤ۔”
عمر گھبرا گیا۔
اس نے ہاتھ تیز کیے۔ ایک پلیٹ اس کے ہاتھ سے پھسلی، سنک کے کنارے سے ٹکرائی، مگر ٹوٹی نہیں۔
وہ ایک لمحے کے لیے رک گیا۔
پھر اس نے گہری سانس لی اور دوبارہ پلیٹ دھونے لگا۔
میں باہر کھڑا رہا۔
اس نے مجھے نہیں دیکھا۔
اور شاید اچھا ہی ہوا۔
بچوں کو بعض سبق باپ کی موجودگی میں نہیں، اس کی غیر موجودگی میں سمجھ آتے ہیں۔
سامنے ہال میں لوگ آرام سے بیٹھے تھے۔
ایک بچہ فرائز پلیٹ میں چھوڑ کر موبائل پر لگ گیا۔
ایک آدمی نے آدھا کھانا چھوڑا اور ویٹر کو اشارہ کیا۔
ایک عورت نے گلاس اٹھا کر کہا:
“یہ صاف نہیں ہے۔”
اور پیچھے عمر کھڑا تھا۔
مجھے اچانک دنیا کی ترتیب بہت صاف دکھائی دینے لگی۔
کچھ لوگ گندگی کرتے ہیں۔
کچھ لوگ صاف کرتے ہیں۔
کچھ لوگ حکم دیتے ہیں۔
کچھ لوگ “جی صاحب” کہتے ہیں۔
اور جو بچہ یہ فرق ایک بار اپنی آنکھ سے دیکھ لے، شاید پھر کسی “جی صاحب” کو حقیر نہیں سمجھتا۔
دوپہر کو عمر باہر آیا۔
اس کے چہرے پر شکست نہیں تھی۔
فخر بھی نہیں تھا۔
صرف تھکن تھی۔
سچی، نمکین، خاموش تھکن۔
اس نے مجھے دیکھا تو چونک گیا۔
“آپ کب آئے؟”
میں نے کہا:
“ابھی۔”
یہ جھوٹ بہت چھوٹا تھا، مگر اس کے پیچھے ایک باپ کی پوری کمزوری چھپی ہوئی تھی۔
اس نے دستانے اتارے۔
انگلیاں سفید اور سکڑی ہوئی تھیں۔
وہ کچھ دیر اپنے ہاتھ دیکھتا رہا، پھر آہستہ سے بولا:
“اندر بہت بدبو ہے، ابا۔”
میں نے پوچھا:
“چھوڑنا ہے؟”
وہ خاموش ہو گیا۔
کچھ دیر بعد بولا:
“نہیں۔ کل آؤں گا۔ آج میں بہت سست تھا۔”
میں نے اس کے کندھے پر ہاتھ رکھا۔
میرے حلق میں ایک تقریر اٹک گئی۔
مگر میں نے کچھ نہیں کہا۔
بعض لمحوں کو الفاظ کی ضرورت نہیں ہوتی۔ الفاظ انہیں چھوٹا کر دیتے ہیں۔
شام کو عمر گھر آیا تو ثنا دروازے پر ہی کھڑی تھی۔
اس نے فوراً پوچھا:
“ہاتھ دکھاؤ۔”
عمر نے ہاتھ آگے کیے۔ انگلیاں دھلی ہوئی تھیں، مگر تھکن ان پر لکھی ہوئی تھی۔
ثنا نے اس کے ہاتھ دیکھے، پھر اسے پانی دیا۔
“کھانا لگا دوں؟”
عمر نے سر ہلایا۔
کھانے کی میز پر اس دن عجیب خاموشی تھی۔ ثنا بار بار عمر کو دیکھ رہی تھی۔ میں اخبار کھول کر بیٹھا تھا، مگر پڑھ کچھ نہیں رہا تھا۔
عمر نے پلیٹ میں سالن لیا، روٹی کا چھوٹا ٹکڑا توڑا، اور بہت آہستہ آہستہ کھانے لگا۔
پہلی بار اس نے پلیٹ میں کچھ نہیں چھوڑا۔
روٹی کا آخری نوالہ بھی کھایا۔
پھر پلیٹ اٹھائی اور کچن کی طرف چل دیا۔
ثنا نے فوراً کہا:
“رہنے دو، میں رکھ دیتی ہوں۔”
عمر نے پلٹ کر ماں کو دیکھا۔
“نہیں امی۔ آج سے اپنی پلیٹ میں خود دھویا کروں گا۔”
ثنا کی آنکھوں میں کچھ چمکا۔
شاید فکر۔
شاید فخر۔
شاید دونوں۔
رات کو میں کمرے میں بیٹھا تھا۔ میز پر صبح والا چائے کا کپ پڑا تھا۔ میں جلدی میں اسے سنک تک لے جانا بھول گیا تھا۔
عمر اندر آیا۔
کپ اٹھایا۔
کچن میں لے گیا۔
دھو کر واپس میز پر رکھ دیا۔
میں اسے دیکھتا رہا۔
وہ دروازے کے پاس کھڑا ہوا اور بولا:
“ابا، گھر کے برتن روز کون دھوتا ہے؟”
میں نے کہا:
“کبھی تمہاری امی، کبھی ماسی، کبھی دادی۔”
وہ کپ کو دیکھتا رہا۔
“کل اتوار ہے۔ ناشتہ کے بعد برتن میں دھو دوں گا۔ بس آپ لوگ زیادہ گندے نہ کرنا۔”
اس نے ہلکی سی مسکراہٹ کے ساتھ کہا اور کمرے سے نکل گیا۔
میں دیر تک اس صاف کپ کو دیکھتا رہا۔
وہ کوئی بڑا منظر نہیں تھا۔
نہ کوئی انقلاب۔
نہ کوئی تقریر۔
نہ کسی فلم جیسا انجام۔
بس ایک معمولی سا کپ تھا۔
جس پر چائے کی پپڑی باقی نہیں رہی تھی۔
مگر مجھے لگا، میرے بیٹے نے آج پہلی پلیٹ نہیں دھوئی۔
اس نے اپنے اندر کا پہلا غرور دھویا تھا۔
تحریرBeenish Iftikhar

Say consistent and focus